LAKI MINTA CIPOK, LANGSUNG DIGETOK!

Sumber : Facebook.
Fanpage : Komunitas Bisa Menulis.
Akun : Mpok Ghibah Kompleks

Nih, saya baru aja baca tulisan seseorang di grup enih. Gak tahu bener atau kagak, tapi saya jadi kepengen ikutan nyablak di mari. Kenapa sebab? Soalnya enih penting banget buat kita, terutama Encing-encing atau Mpok-mpok  nyang punya anak perawan.

Dia kata, ntuh nyang punya tulisan, pacarnya minta cipokan. Terus dianya minta putusan. Begitulah kira-kira nyang dia maksud.

Nah, sebagai Mak-emak super bawel nyang masih doyan ngegibahin tetangga nyang baru beli kulkas atau gelang emas baru, saya pengen ngasih tahu, yak. Ini khusus buat elu-elu pada, anak-anak perawan atau gadis, nyang masih pacaran. Baca tulisan saya enih, yak!

Begini, otak laki ama otak perempuan itu beda. Terutama dalam urusan nafsu. Waktu pacaran, apalagi dua-duaan, kepala laki itu pikirannya kebanyakan pada satu hal, yaitu syahwat. Cukup, cuman satu nyang ntuh aja. Sementara perempuan, laen lagi dan bisa macem-macem. Nyang penting dia seneng. Baik seneng karena dijajanin, dibelanjain, diajak nongton felem, atau nongki-nongki sambil madang-madang cemilan.

Cara laki nyari tahu karakter pacarnya, segimana susah atau gampangnya elu-elu dipintain ama dia, dimulai dari sentuhan tangan atau kulit. Kalo elu kagak marah atau cuekan, mangka dari sentuhan tangan tadi, bakal pindah ke bagian laen. Misalnya punggung, pinggang, bahu, leher, terus lanjut ke kepala, dan begitu seterusnya. 

Intinya, selama elu gak ngasih batasan ama pacar elu nyang laki ntuh, dia bakalan terus mikir dan mikir, gimana caranya bisa ngedapetin elu dengan gampang dan gratis.

Nah, kalo udah nyampe ke soal cipokan, elu-elu malah ngasih respons ama balesan serupa, mangka udah pasti si laki enih bakalan ngerembet mintain nyang laennya. Kagak usah disebutin, dah. Pasti udah pada paham, kan? Pokoknya, ujung-ujung di paling ujung, dia juga pasti bakalan kepengen nyicipin apem elu. Dikasih sekali, minta dua kali, terus tiga kali, dan berkali-kali. Gak percaya? Jangan dicoba! Bahaya!

Nih yak saya kasih tahu aja. Elu-elu, kalo pada masih pacaran udah berani maen celup-celupan, pihak nyang paling dirugiin itu pasti perempuan. Selalu begitu dan begitu. Laki mah bebas, kagak ada bekasnya. Lah, elu-elu nyang masih anak perawan? Rugi besar lu! Udah mah kesucian elu hilang, kagak ada lagi nyang bisa dibanggain. Ujung-ujungnya kalo sampe bunting, elu juga nyang nanggung beban. Yak, iya kalo lakinya mau ngawinin. Kalo kagak? Ditinggal mabur, baru tahu rasa lu.

Udah mah ditinggal bunting, belangsak sendiri nyang ada. Dia nyang nyolokin, malah elu nyang dicuekin. Sembilan bulan nanggung beban, nahan rasa malu, berasa diri kagak ada harganya, pas lahiran kagak ada bapaknya ntuh bocah. Terus elu sendiri juga nyang kudu ngerawat, ngurusin, ngempanin, ampe urusan udah gede ntuh anak, kagak bakalan kelar-kelar. Tetep aja elu-elu juga nyang direpotin. Lah, pihak lakinya nyang udah ngasih elu semprotan, anteng-anteng bae kagak mau peduli ama elu dan anak elu berdua.

Pokoknya, gua kasih tahu, elu-elu kalo emang masih pada demen pacaran, kagak usah nyoba-nyoba maen mantenan, dah. Entar aja, nunggu ampe elu berdua bener-bener sah jadi laki-bini. Mau saban jam pada colok-colokkan juga, orang laen kagak bakalan nyaram. Bodo amat. Paling-paling, mertua elu tuh nyang ngedumel setok sabun ama samponya cepet abis.

Terakhir buat elu-elu nyang perempuan, jangan pada kegatelan, dah. Palagi sampe kepengen diperhatiin ama dipuji-puji laki pengangguran. Jualan orat ama apem di internet, buat apa? Kalo elu mau dapetin nyang baek, elunya juga nyang kudu mahal. Entar nyang dateng pasti lebih berkelas, Neng. Bukan bocil nyang suka ngerayu elu di kolom komentaran atau ngumpet di DM-an. Kagak modal amat tuh bocah, yak! Gedeg saya.

Elu juga, Neng! Jangan mau, gara-gara elu dijajanin cilok, eh ngasih gratisan pas pacar minta nyolok. Ngerayu elu pake siomay, tapi kudu dibayar ama elu sampe dia ngacay. Nawarin elu miksu, balesannya harus nyusu.

Nih, Neng! Saya kasih bocoran dikit. Kalo pacar elu sering muji, artinya dia lagi nguji. Pura-pura nanyain kabar, bisa jadi dia ngajak mabar. Sering dateng, bisa jadi pacar elu lagi ngaceng.

Selama hubungan elu berdua masih belum jelas dan tanpa stempel pihak penghulu, jangan pernah ngasih akses apa pun. Bilang ama dia, "Halalin Eneng ama seperangkat alat dekor, abis ntuh Abang bebas sampe gempor!" 

Udahan, ah. Met puasa aja, yak!